O proxecto STARS involucra tanto aos concellos como aos centros educativos, e ten por obxectivo fomentar pautas de mobilidade máis activas e sustentables nos estudantes, diminuíndo a utilización do coche.

O IES Xograr Afonso Gómez é o primeiro centro da provincia en adherirse a STARS que promove pautas de mobilidade máis activas entre os escolares. Con esta iniciativa, na que participaron máis activamente arredor de 160 estudantes de secundaria e bacharelato, fomentouse entre o alumnado o uso de medios alternativos ao coche para os desprazamentos ao centro escolar.

Desenvolvéronse talleres de formación de profesorado e alumnado sobre urbanismo, ciclismo, técnicas de comunicación, entre outros; leváronse a cabo charlas, exposicións, carteis, vídeos e cancións, así como estratexias de mobilidade do centro educativo.

A subdelegada entregou o diploma que certifica a valoración de prata no proxecto, obtendo unha puntuación de 31 de 33 posibles, pola súa implicación, número de actividades realizadas e resultados obtidos no cambio dos desprazamentos. Fíxoo acompañada polo alcalde de Sarria, Claudio Garrido, o xefe provincial de Tráfico, Ángel Álvarez, e a coordinadora  provincial de Educación Vial, Laura García; así como polos concelleiros de Mobilidade, Félix Seijas, e de Educación, Eugenia Valcárcel, e o director do centro, José Manuel Valcarce.

O proxecto STARS vai dirixido fundamentalmente a alumnos/as de 6 a 18 anos, que se converten en protagonistas da iniciativa pois son os propios escolares quen deseñan campañas de fomento da mobilidade sostible, potenciando así a súa creatividade e capacidade de comunicación.