O Goberno inviste 306.000 euros para renovar a oficina de emprego de Sarria

A subdelegada do Goberno en Lugo, Isabel Rodríguez anunciou este luns que o Goberno achega un investimento de 306.800 euros para a renovación da oficina de emprego no concello de Sarria. A subdelegada fixo este anuncio logo de manter unha reunión coa directora provincial do Servizo Público de Emprego Estatal (SEPE), Estefanía Pita.

Reunión Isabel Rodríguez Estefanía Pita / Subdelegación do Goberno

O Ministerio de Traballo e Economía Social resolveu o Plan de subvencións para financiar a renovación de instalacións en oficinas de emprego con persoal do Servizo Público de Emprego Estatal. “Esta é unha demostración máis do compromiso que mantén o Goberno cos concellos da provincia, mellorando e fortalecendo un servizo imprescindible para a cidadanía, máis necesario que nunca para desenvolver con éxito as novas políticas de emprego”, manifestou Isabel Rodríguez.

Con esta nova actuación, o Goberno achega case 2,2 millóns de euros para a mellora de oficinas de emprego na provincia, en Lugo, Monforte de Lemos, Vilalba e Sarria. Estas oficinas son compartidas co Servizo Galego de Colocación da Xunta de Galicia, polo que será a Comunidade Autónoma a encargada de xestionar estes fondos do proxecto.

Este Plan de subvencións do Goberno ten por obxecto a realización de obras de renovación, adecuación e/ou reparación total ou parcial das instalacións, centros e dependencias das oficinas de emprego xa existentes ou de nova planta. O Goberno achega outros 312.880 euros para a dotación de novas instalacións en Monforte de Lemos.

DEIXAR UN COMENTARIO

Please enter your comment!
Please enter your name here