Zeltia Mateo, á que xa entrevistamos neste medio a principios de ano, segue dando pasos como maquilladora de FX. Aínda que no día a día gáñase a vida como peiteadora rural, a súa afección á maquillaxe está empezando a esperar interese e a proxectarse.
En marzo deste ano chamárona do programa “Quen anda aí?” da Televisión de Galicia e no transcurso do mesmo puido verse unha reportaxe que lle fixeron en Quiroga, vendo como é un dos seus servizos de perruquería a domicilio; e despois, en directo no plató, Zeltia fixo unha maquillaxe de fantasía en directo a unha veciña súa de Quiroga –Kelly– comentando ademais o seu labor profesional co equipo.
Meses despois, en xullo, era convidada polo festival Fancine de Lemos para facer unha demostración de maquillaxe corporal en directo no parque dos Condes en Monforte de Lemos. Esta actividade complementaba unha proxección de curtas realizadas a través de proxectos impulsados dende colexios de Monforte.
INTERESE POLO SEU TRABALLO EN TEMPO DE SAMAÍN
E foi estes días cando volveu ser reclamada do “Quen anda aí?”. “Acordáronse de min e chamáronme para ir en directo ao programa do xoves 26 de outubro. Fixen unha automaquillaxe de cabaza e despois fíxenlle unha maquillaxe con detalles de zombi a unha colaboradora”, conta Zeltia.
E non queda aí a cousa, porque esta quiroguesa ao chegar á casa viu unha mensaxe que lle chegaba por Instagram. Unha rapaza dicíalle que lle gustaba o traballo que facía e propúxolle facer unha conexión por videchamada para entrar no programa do venres de Antena 3 “Espejo Público”. Dito e feito, esta mañá saía Zeltia no magacine desta canle onde se deu a coñecer moi brevemente para a continuación quedar emprazada para o luns 31, día propio de Halloween, e falar con máis detalle das maquillaxes que fai.
PRIMEIRA EXPERIENCIA NO CINEMA
A todo isto, en setembro deste 2022 tivo a oportunidade de participar como maquilladora de cinema en Bertamiráns, na curtametraxe “Amor viaxeiro”.
Chamouna Sara Casanova, unha das rapazas que forma parte do equipo que está gravando esta obra audiovisual, e alá se foi para caracterizar a unhas actrices. “Foi a miña primeira maquillaxe para cine e estou aberta a outros traballos que me podan saír”, di con gran satisfacción Zeltia.
‘Amor viaxeiro’ é un proxecto premiado por Netflix e Turespaña e ideado por sete alumnos/as de Lugo, do Centro de Formación Audiovisual da Deputación. Foi premiado con 7.000 euros e neste mes de outubro estaba previsto que remataran a produción da curtametraxe, baixo a supervisión do centro de ensino audiovisual da Deputación e dos organismos convocantes do premio.
