O BNG volve pedir que se cubra a praza de medicina familiar no Centro de Saúde de Pantón

Centro Saúde Pantón / BNG Pantón

O BNG de Pantón denuncia que, un ano despois, o PP segue sen cumprir os acordos parlamentares, e denuncia que “na actualidade aínda están con dous médicos de familia, tras as promesas incumpridas da alcaldía e do Sergas”.

Nun comunicado, os nacinalistas insisten en reclamar que se cubra, cando menos, a 3ª praza de medicina familiar do centro de saúde do concello. “É unha burla xa que esta cobertura constitúe unha urxencia para nós. Ademais chegamos a isto pola falta de sentido común da que fixo gala a alcaldía, cando desde o BNG avisamos en tempo e forma de cales eran as canles para cubrir a terceira praza”, din.

O BNG lembra que “había praza, había persoal” que quería cubrir esa praza e había concurso de traslados, pero o Sergas optou por non sacala a concurso, “o que demostra que nunca quixo cubrila de maneira  definitiva e continuada”. “Queremos ser optimistas e lembrar que aínda o poden arranxar, e avisamos de novo: se non a cobren antes das eleccións municipais despois será historia”, avisa.

A formación nacionalista agarda que este periodo pre-electoral “é crucial”, xa que “se volve gañar o PP sen cubrir a praza, que se esqueza todo o mundo do terceiro médico de familia en Pantón”. Tamén preveñen os nacionalistas das “habituais trampas dialécticas e de cobertura parcial”.

Neste sentido crítico en relación á falta de médicos, o BNG do Sur de Lugo anunciaba unha campaña de reivindicación da sanidade pública Comarcal hai unhas semanas, nomeadamente da primaria. 

DEIXAR UN COMENTARIO

Please enter your comment!
Please enter your name here