Nova cuberta no acceso ao pavillón do colexio de Escairón

A Consellería de Cultura, Educación, FP e Universidades vén de dotar dunha cuberta a zona de acceso ao pavillón do CPI Dr. López Suárez de Escairón, no concello do Saviñao. O investimento foi duns 13.700 euros.

CIP López Suárez nova cuberta / Delegación Territorial

As obras consistiron na execución dunha estrutura con teito de chapa na rampla que leva ás escaleiras de entrada ao recinto deportivo. O obxectivo era acadar un espazo máis confortable que ofreza resgardo aos usuarios nos días de chuvia ou moito sol.

A actuación foi financiada con cargo ao plan de reforma, ampliación e mellora (RAM) de centros educativos para 2022, que incluíu nove obras menores na Zona Sur da provincia de Lugo cun investimento total de 156.800 euros.

Outras intervencións programadas nesta anualidade foron as reformas nos baños do IES  A Pinguela e o acondicionamento dunha aula no CEIP A Gándara (ambos en Monforte de Lemos); obras de mellora da eficiencia enerxética no CEIP de Quiroga; renovación dos canlóns no IES Lama das Quendas de Chantada ou traballos de electricidade no CEIP Xosé Lois Taboada (Carballedo), entre outras.

Segundo sinalou o delegado territorial, Javier Arias, na visita ás obras “nesta área da provincia a Xunta ten en diferentes fases de execución proxectos de grande envergadura para mellorar seis centros educativos por valor de 2,9 millóns de euros con cargo ao Plan de Nova Arquitectura Pedagóxica de Galicia.”

DEIXAR UN COMENTARIO

Please enter your comment!
Please enter your name here