Ángel Carracedo, un dos nomes máis destacados da ciencia en Galicia, volveu ao IES A Pinguela para impartir ao alumnado de Bacharelato con Bioloxía unha interesante conferencia que levou por título: “Medicina Xenómica, a chave da medicina de precisión”.

Ademais de contarlles que está traballando en distintos grupos de investigación que dirixe en todo o mundo, e como se están combatendo de xeito eficaz enfermidades tan graves como o cancro, tratou con eles outros temas.

Falou de prevención, aspecto que é e vai seguir sendo de vital importancia para a medicina, dado o caros que son e van a seguir sendo os tratamentos. E neste senso puxo énfase na análise xenética das
persoas en principio predispostas para contraer determinadas enfermidades.

E no que se refire ao traballo científico de seu, subliñou a importancia da vocación e do aspecto interdisciplinario dos equipos de investigación para obter resultados nun ámbito tan competitivo como é o da Ciencia.

ÁNGEL CARRACEDO

Ángel Carracedo ten case todos os premios do mundo no campo da xenética. Preside e Fundación Galega de Medicina Xenómica, o Centro Nacional do Genotipado, foi director do Instituto de Medicina Legal de Santiago, vicepresidente da Academia Internacional de Medicina Legal e Presidente da
Sociedade Internacional de Xenética Forense entre outras moitas institucións científicas.

No que se refire á divulgación, Carracedo é autor de centos de publicacións, e ten un recoñecido liderado internacional en xenética forense. Foi obxecto de importantes distincións, tanto en España como a nivel internacional, e distinguido como doutor “honoris causa” de distintas universidades.

Proposto para o premio Príncipe de Asturias, é o primeiro científico en obter tamén o Otero Pedrayo por prestixiar o idioma galego. Pero sobre todo é unha persoa extraordinaria pola súa sabedoría e pola súa humanidade.

“Para o noso instituto será sempre un honor recibilo nun salón de actos que, desde hai anos, leva o seu nome”, comentaba Enrique Sampil, director do IES A Pinguela.