A institución provincial licitou no Saviñao, por preto de 200.000€, os traballos de mellora da LU-P-5802, que conecta Porto con Córneas polo Casar en algo máis de 3 quilómetros -desde o inicio ata o 3,385-; e do primeiro quilómetro da LU-P-5805, de Segán a San Vitorio.
Tamén se aprobou declarar de emerxencia a execución das obras necesarias para reparar 4 estradas que sufriron danos polo temporal de fortes choivas do pasado mes de xaneiro en Baleira, A Fonsagrada, Chantada e Carballedo.
A actuación que supón maior investimento afecta a dúas estradas provinciais ao seu paso polos concellos de Chantada e Carballedo. Son a LU-P-1801, de Chantada ós Peares, e a LU-P-1010, que vai hacia a presa dos Peares, no termo municipal de Carballedo. En conxunto, a Deputación dedica máis de 670.000€ para a súa reparación.
Adxudicación directa de dúas parcelas no polígono dos Acivros
A Xunta de Goberno aprobou ademais a adxudicación directa de dúas parcelas no polígono industrial dos Acivros, en Chantada, por preto de 85.000€. Trátase da parcela 46, que conta con 1.305 metros cadrados e a parcela 47, con 1.338 metros cadrados.
Neste polígono, a Deputación xa ten vendidas un total de 35 parcelas, das 49 que eran de titularidade provincial. Agora mesmo quedan 5 dispoñibles -cunha superficie media de 1.000 metros cadrados cada unha- e hai outras 9 parcelas reservadas.
Terceira edición do Coñece a túa provincia
Aprobada na Xunta tamén a listaxe de entidades admitidas na terceira edición do programa Coñece a túa provincia da Deputación,que nesta terceira convocatoria ofrece un total de 3.036 prazas e que se celebrará novamente en dúas quendas: na primavera e no outono. En concreto, a institución provincial recibiu para o ano 2023 solicitudes de 216 colectivos, das cales foron admitidas 136 seguindo a orde de inscrición, tal e como sinalan as bases.
Ademais aceptáronse 77 entidades que entran na listaxe de agarda e tres solicitudes foron excluídas por non cumprir con algún dos apartados da convocatoria. A relación de todas as solicitudes -admitidas, en agarda e non admitidas- publicarase mañá no Boletín Oficial da Provincia.