No mes de febreiro hai dúas datas moi importantes relacionadas co cancro: o 4 de febreiro conmemórase o “Día Mundial Contra o Cancro” e o 15 de febreiro o “Día Internacional do Cancro Infantil” e por iso, este ano dende a asociación “Chantada Contra o Cancro” realizan unha charla sobre cancro infantil grazas á colaboración do equipo do “Centro Neurosinais” de Chantada. Terá lugar este venres, 10 de febreiro ás 20:00 h. no Auditorio Municipal de Chantada. A entrada é libre e gratuíta para calquera persoa interesada.

Con esta conferencia preténdese explicar como se pode axudar a un/ha neno/a e á súa familia, así como ao seu círculo próximo, dende o diagnóstico inicial ata o posible tratamento posterior, dende os eidos da terapia ocupacional, a fisioterapia neurolóxica e a logopedia. Tamén se resalta a necesidade de adaptar as actividades propostas ós gustos e intereses da/o nena/o e ás súas características persoais, sendo o xogo un dos pilares da intervención.

A charla céntrase máis nas idades infantís e xuvenís, pero este tipo de apoio tamén se pode facer en adultos de diferentes idades. A través de explicacións próximas e de exemplos, tanto o equipo multidisciplinar do “Centro Neurosinais” coma de “Chantada Contra o Cancro”, queren achegar esta información que pode ser de moito interese para as familias.

Neurosinais é un centro específico de neurorehabilitación e neurodesenvolvemento para a poboación adulta e infanto-xuvenil. Atópase en Chantada achegando ao rural terapias especializadas, integrais e personalizadas co fin de capacitar aos usuarios e os seus familiares para acadar unha mellor calidade de vida. As profesionais que van impartir esta conferencia-coloquio son:

   – Sandra Rodríguez Cortiñas: directora do centro, terapeuta ocupacional e especialista en terapia acuática. Conta con experiencia e formación en neurorehabilitación en adultos e atención en poboación infantil con alteracións no procesamento sensorial.

  – Lucía Fernández Fernández: fisioterapeuta especialista en neurorehabilitación. Ten experiencia en xeriatría e formación específica en rehabilitación neurolóxica e exercicio terapéutico en poboación adulta e infanto-xuvenil.

  – Paula Piñeiro Guimeráns: logopeda especialista en atención temperá con experiencia en neurodesenvolvemento infanto-xuvenil e formación específica en rehabilitación neurolóxica en adultos.

  – Laura Pateiro Méndez: logopeda con experiencia e formación en atención temperá e neurorehabilitación en poboación adulta e infanto-xuvenil.