Do sábado 1 ao domingo 9 de abril, ofrécense dúas visitas guiadas a elixir, que se poden combinar con dúas ‘experiencias vitivinícolas’ en diferentes puntos da parroquia de Vilachá de Salvadur. Dentro do programa de visitas guiadas, totalmente gratuítas, ofrécese unha ao xacemento arqueolóxico dos Conventos. Aquí, no marco do proxecto Adegas da Memoria, realizouse a primeira datación por Carbono-14 para saber con exactitude científica as orixes das terrazas vinícolas da ribeira.

A outra visita guiada é un ‘paseo entre pataos’, entre as viñas da ribeira do Eivedo, onde os visitantes poderán coñecer a viticultura tradicional, a historia da Ribeira Sacra e lendas da zona.

Experiencias de viño da man de veciños

As visitas son combinables con unha, ou dúas, experiencias vitivinícolas. As experiencias de viño teñen un custo de tres euros por persoa, que inclúe unha cata de viño. Por un lado, coincidindo co comezo da tempada de furanchos, a experiencia do Furancho O Currio, o primeiro local deste tipo da Ribeira Sacra. Consiste nun paseo pola aldea de Trasmonte que acaba cun viño de Pedro na súa adega furancho. Ademais este furancho abrirá de abril a xuño coa opción de prórroga de xullo, polo que durante a Semana Santa xa estará aberto, quedando inaugurado nesta tarde de venres.

Por outro lado, a experiencia Val do Frade, unha adega que fai viños con D.O. Ribeira Sacra, no propio conxunto de adegas tradicionais da Abelaira, en Vilachá. Xunto coa adegueira Puri, os visitantes poden dar un paseo polas adegas e adentrarse nunha delas para probar o viño. Tanto para as visitas guiadas como para as experiencias de viño, é preciso un mínimo de 5 persoas. Para máis información e reservas, hai que contactar por chamada ou WhatsApp no teléfono 650 624 828.