Un dos efectos que causan os tratamentos oncolóxicos é a desnutrición, unha característica común aos pacientes con cancro e que repercute na súa calidade de vida e na súa supervivencia, polo que é moi importante tratala. A mingua parcial ou total do apetito (hiporexia, anorexia) e os síntomas dixestivos (estrinximento, mucosite, disfaxia, etc.) forman parte destes efectos secundarios máis habituais que inflúen dun xeito moi importante no estado nutricional destes pacientes. De todos eles falará a relatora desta xornada: Nazareth Rodríguez Novo.
Nazareth Rodríguez, médica especialista en Endocrinoloxía e Nutrición do HULA, Hospital Universitario Lucus Augusti, será a encargada de impartir esta conferencia-coloquio. É licenciada en Medicina e Ciruxía pola USC, Universidade de Santiago de Compostela (2008-201), con residencia en Endocrinoloxía e Nutrición (2015-2019) e traballa como médica de Endocrinoloxía na Unidade de Nutrición hospitalaria do HULA dende 2019 ata a actualidade.
