A plataforma cidadá Salvemos O Malecón entregaba hai unha semana no Concello de Monforte unha petición con centos de firmas (2,886 entre as recollidas en papel e online) en contra da construción dunha ponte para o tráfico rodado que ameaza a zona. “O proxecto está a xerar unha grande inquedanza entre os habitantes de Monforte, que valoran e aprecian a tranquilidade e o valor paisaxístico deste espazo. Esta masiva resposta demostra a unidade e a determinación da comunidade para protexelo”, sinalan desde a plataforma.

En consonancia coas políticas urbanas actuais, que promoven a integración de infraestruturas respectuosas co medio ambiente, a diminución do tráfico no centro das vilas, e a conservación dos espazos verdes, a plataforma fai un chamamento ó Concello para que reconsidere a construción da ponte proposta. Ínstase ás autoridades a explorar alternativas que se axusten a un enfoque de desenvolvemento urbano sostible e que garantan a integridade e a beleza do Malecón.

Salvemos O Malecón espera que esta entrega de firmas sexa un chamamento de atención para as autoridades municipais e se inicie un diálogo aberto e construtivo entre todas as partes interesadas. A plataforma comprométese a seguir defendendo a protección do Malecón e a traballar en colaboración coas autoridades, organizacións e cidadáns comprometidos para atopar solucións que preserven o noso patrimonio natural.

Peonalización da ponte vella

Esperta Monforte ten reclamado en varias ocasións a peonalización da ponte vella, a través de mocións e outros actos como o desenvolto a pasada fin de semana. A medida estaba no programa de Esperta Monforte desde o 2015. Insisten en que non está deseñada para soportar o tráfico motorizado.

“Estamos seguros que ademáis esta medida redundaría no desenvolvemento económico da zona urbana da contorna , como xa ten sucedido nas outras areas urbanas que se teñen peonalizado previamente , como por exemplo a rua do Cardeal , que a pesar da resistencia inicial de algúns sectores, e que a dia de hoxe ninguén discute, nin podemos imaxinar unha volta atrás”, aseguran desde Esperta Monforte.