A Xunta reactivou o pasado 29 de maio as notificacións para levar a cabo queimas agrícolas por parte de particulares. Ao efecto de realizar as devanditas comunicacións, sempre con dous días de antelación á queima, a Xunta habilitou unha páxina web e o teléfono 012.

No portal da internet destinado a comunicar as queimas de restos agrícolas amoreados os cidadáns deberán confirmar que se trata dunha “queima correspondente a palla e/ou material natural, agrícola, non perigoso, utilizado en explotacións agrícolas e/ou gandeiras”.  

Ás persoas interesadas preguntaráselles tamén se se trata do tipo de material e circunstancias indicadas e poder continuar co proceso de comunicación.

RESTOS FORESTAIS

Dende o 29 de maio retómanse tamén as solicitudes de autorización para efectuar queimas de restos forestais amoreados. Neste caso, como vén sendo habitual, cómpre contar con autorización administrativa dado o maior risco da actuación.

As comunicacións e autorizacións de queimas deste tipo de restos forestais tamén se farán a través do 012 ou da web da Consellería do Medio Rural. Estas son posibles de acordo co establecido no artigo 34 da Lei de prevención e defensa contra os incendios forestais de Galicia.

Tanto as comunicacións como as autorizacións deixarán de ter validez nos días que hai vento e altas temperaturas.