A temática do acto aberto a toda a veciñanza que organizou a biblioteca do Instituto de Educación Secundaria de Quiroga xiraba arredor da saúde mental tendo como fío condutor o libro “Non penses nun elefante rosa” da autora galega Antía Yáñez.
Na mesa redonda, moderada pola coordinadora do club de lectura do IES, Aldara Pérez González, participaron Antía Yáñez, autora do libro; Laura Álvarez, membro do club de lectura de adultos; Almudena Rodríguez, representante dos país e nais do centro; Marisa Castro, directora do CIM de Quiroga e dúas representantes do alumnado.
No transcurso da xornada tentouse dar unha visión da saúde mental dando respostas a cuestións como: canto custa ir ao psicólogo, se soamente é necesario ir cando tes unha enfermidade mental, que é o TOC, que pensan os nosos adolescentes da saúde mental ou se é importante para os pais e nais a saúde mental. Todas estas cuestións foron redactadas previamente polo alumnado do club de lectura do IES de Quiroga.
