As actuacións enmárcanse dentro do proxecto de obras de mellora en 13 vías de urbanas e rurais que deu a coñecer hai unhas semanas o Alcalde, e que contan cun investimento total próximo ós 300.000€ (297.800,63 €.).
As rúas Fontecha e Tomás Vázquez presentan un firme que aconsella unha actuación completa de renovación do mesmo, sendo necesario proceder ó fresado dos entronques iniciais e finais de ditas vías, previamente á colocación dunha nova capa de rodadura de aglomerado en quente. Procédese ó fresado do firme, ó barrido do firme nas zonas afectadas por medios mecánicos. O asfaltado do firme farase con aglomerado en quente tipo D-12 de 5 cm de espesor e tamén se realizará o recalce das tapas de rexistro en calzada en dado de formigón. Farase o pintado de marcas viais incluídos símbolos e cebreados con pintura reflexiva e microesferas de vidro. Trátase, polo tanto, dunha renovación completa do pavimento de máis de 300 metros lineais, concretamente, 105 m. na Rúa Tomás Vázquez e 201 m. na rúa Fontecha.
O orzamento total destinado a estas dúas actuacións case alcanza os 36.000 euros, concretamente os 35.840,41€, sendo destinados 13.699,42 € á rúa Tomás Vázquez e 22.140,99€ para a Rúa Fontecha.
O rexedor monfortino resalta que “isto supón a continuidade do desenvolvemento dun ambicioso programa de melloras de infraestruturas urbanas e da rede viaria da nosa cidade e das nosas parroquias, porque este é un compromiso que eu como Alcalde teño adquirido cos monfortinos e coas monfortinas e que veño de renovar tras o respaldo acadado nas recentes eleccións municipais, e no que non esquecemos a ningunha parroquia, nin a ningún barrio de Monforte de Lemos.”
