O alcalde, José Tomé, cualificou a edición de 2023 como mellor das celebradas ata a data, e para elo resaltou “a asistencia masiva de público nesta edición que podemos calificar de excelente, e pola que pasou tanta xente polo recinto do Festival durante os tres días como poboación ten Monforte no casco urbano, que é unha cifra enorme nun espazo limitado de tempo”, unha cifra que se estima en arredor de 15.000 persoas.
Outro dos aspectos nos que se sustenta o éxito da 5ª edición deste Festival do Viño son as cifras de ventas acadadas. “Vendéronse uns 10.500 tíckets, sen ter en conta as vendas directas en botella, que tamén é unha cantidade considerable, o que supón un 61% máis que en 2019, antes da pandemia”. A venta no número de copas subiu un 40% con respecto á edición de 2022, o mesmo que os portacopas, que aumentaron nun 44%.
José Tomé resaltou na súa intervención “o compromiso das 30 adegas que estiveron presentes e a satisfacción que me fixeron chegar pola excelente organización do conxunto do Festival” e engadiu que “xa houbo algunha adega das de maior tamaño da D.O. que este ano non puido estar presente, e que xa me fixo chegar o seu interese para participar na próxima edición de 2024”.
Tamén, o rexedor monfortino agradeceu ó Consello Regulador da D.O. Ribeira Sacra a súa colaboración e sobre todo á xente do mundo do viño, “que colaboran masivamente co Festival en datas de moito traballo para as adega. O Festival do Viño da Ribeira Sacra de Monforte supón un colofón á tempada de promoción previa á seguinte vendima, nun lugar único como é o paseo do Malecón”.
En canto aos cinco concertos celebrados durante o Festival (Compañía de danza Fran Sieira, Sés, Diboa, Xisco Feijoó e Fillas de Cassandra) “foi un acerto e que congregaron a numeroso público que contribuíu a que a xente permanecera máis tempo no entorno do Malecón, e polo tanto, dentro do ambiente do Festival do Viño”, indicou o Alcalde.
O concello de Monforte investiu nesta cita, 158.000 euros, e asegura que traballan xa na seguinte edición, “que será os días 5, 6 e 7 de xullo de 2024, a primeira fin de semana completa do mes de xullo, para o que estamos recopilando datos e suxerencias, tanto de adegas como de público asistente que nolas fixo chegar”.
Festival do Viño 2023 / Facebook Vinosacra.es
