A Xunta Local de Seguridade de Monforte reuníase este ventes pola mañá coa asistencia do alcalde, José Tomé Roca, a Subdelegada do Goberno en Lugo, María Isabel Rodríguez, a 1ª tenente de alcalde, Gloria Prada, representantes da Policía Nacional en Monforte, da Garda Civil, o representante da D.X. de Emerxencias, o representante da Policía Autonómica así como da Policía Municipal.

A xuntanza tivo por obxectivo analizar e organizar o dispositivo de seguridade con motivo das Festas Patronais da cidade, que darán comezo o venres, 11 de agosto, e que se estenderán ata o mércores 16. Cóntase cun plan coordinado entre a Policía Nacional e a Policía Local, “que ten como fin velar pola tranquilidade da cidadanía, garantir a orde pública e poder dar unha resposta rápida e eficiente no caso de que se producise calquera incidente.” Efectivos da Garda Civil prestarán a súa colaboración na periferia da cidade, así como nos seus principais puntos de acceso, facendo os correspondentes controis.

Colaborará tamén unha patrulla da Policía Autonómica que centrará o seu traballo na prevención do consumo excesivo de alcol nas zonas cunha maior presenza de persoas. E os bombeiros de Monforte ante situacións como os fogos artificiais.

Boas cifras para Monforte nas taxas de criminalidade

Na xuntanza destacouse o descenso do número de delitos no municipio, desde a última Xunta Local de Seguridade celebrada o pasado ano, grazas ao traballo realizado pola Policía Nacional e Local. “A taxa de criminalidade en Monforte descendeu con respecto a anos anteriores, situándose nos últimos 12 meses no 12,49 ‰ (por mil), unha das máis baixas do Estado”, destacou o Alcalde.

A delincuencia descendeu, con valores inferiores aos que se rexistraron no mesmo período de 2022, con 23 delitos menos. Isto supón unha diminución do 9,24% en relación co 2022, no que houbera 249 infraccións penais (das que 109 foran delitos graves e 140 leves).