O pasado martes 8 de agosto a Virxe dos Remedios da Ermida, acompañada do Meco e as Pampórnigas, visitaba Castro Caldelas. E o xoves 11 era a Virxe dos Remedios de Castro Caldelas e a súas figuras emblemáticas, o Irrio Peliqueiro e as Cocas, as que visitaban o santuario da Ermida, en Quiroga.
Estes intercambios forman parte do irmandamento realizado entre as dúas igrexas no pasado mes de abril, coa sinatura dun convenio entre os párrocos destas parroquias, do que demos conta neste mesmo xornal dixital.
As rúas da Ermida acollían o devandito 11 de agosto a procesión presidida pola Virxe de Castro Caldelas á que ían abrindo paso o Meco e as Pampórnigas; e o Irrio Peliqueiro e as Cocas, figuras semellantes ás da Ermida. Numerosos veciños e devotos, e o alcalde de Quiroga e a alcaldesa de Castro Caldelas, non quixeron perder a oportunidade de acompañar ás imaxes en procesión ademais de asistir á misa coas dúas imaxes da virxe dos Remedios.
MOTIVOS DO IRMANDAMENTO
As razóns que levaron aos dous párrocos a tomar a decisión desta irmandade foron dúas principalmente. A primeira delas é que nos dous lugares tense a mesma advocación mariana á “Virxe dos Remedios” e a outra é que as dúas parroquias teñen elementos de carácter popular nas súas procesións dende os séculos XVII – XVIII. Trátase, neste caso, das figuras do Irrio e as Cocas en Castro Caldelas, e do Meco e as Pampórnigas na Ermida, no Concello de Quriga.
Unido ao anterior, os párrocos das respectivas parroquias explican que son zonas pastorais próximas entre as que xa se prestan certa axuda e ademais este encontro serve para visibilizar e promocionar as dúas romarías.
Coa sinatura do convenio no mes de abril as dúas igrexas comprometéronse a celebrar misas e procesións conxuntas na honra á Virxe dos Remedios, patroa das dúas parroquias, na que se unan as imaxes das Virxes e tamén os personaxes emblemáticos destas dúas parroquias.
