Ante as novas difundidas sobre unha agresión sexual a unha muller, rexistrada nun pub de Sarria a finais do pasado mes de setembro, e tras constatar coas forzas e corpos de seguridade a existencia da correspondente denuncia e a detención de tres varóns relacionados con eses feitos, desde a Corporación Municipal de Sarria expresan de xeito unánime “a nosa solidariedade coa vítima e a nosa enérxica repulsa e condena ante calquera manifestación de violencia machista, ao tempo que solicitamos que se diriman canto antes as responsabilidades penais que poidan derivarse.”

Todos os grupos representados na Corporación Municipal reiteran o seu compromiso para que este tipo de sucesos non volvan producirse e poñen todos os recursos dos que dispón o concello ao servizo de calquera muller agredida.

“Desde o Concello de Sarria seguiremos a traballar na formación, concienciación e sensibilización para xerar entre todas e todos unha cultura de rexeitamento absoluto da violencia machista, de promoción das relacións igualitarias e de respecto absoluto polas mulleres, para que se sintan libres e seguras en todo momento e en calquera lugar do noso municipio”, conclúen desde o concello de Sarria.