Este encontro, dirixido por Mónica Luengo e Cipriano Marín, especialistas internacionais con experiencia en candidaturas recoñecidas pola Unesco, prolongarase ata o mércores e que se pode seguir tanto de xeito presencial como vía streaming, inclúe un amplo programa de actividades con presentacións, conferencias e mesas redondas, entre outras iniciativas, nas que participarán representantes de organismos como a Unesco, Icomos, a Unión Internacional para a Conservación da Natureza, así como das universidades e outras institucións.
Román Rodríguez agradeceu a participación “de expertos de recoñecido prestixio por compartir o seu coñecemento” e animou a que este encontro contribúa a acadar o máximo recoñecemento da Unesco. Nesta mesma liña, destacou a implicación da sociedade civil e fixo un chamamento para seguir afrontando de xeito conxunto “o verdadeiro reto de país que supón poñer en valor e protexer este territorio. Este é un proxecto colectivo e só sumando esforzos imos ser capaces de acadar a meta proposta”.
Destacou tamén o compromiso do Goberno galego coa candidatura, “cun investimento de 7,2M€ para garantir a conservación de 44 bens deste territorio da provincia de Lugo e Ourense con máis de 80 actuacións arquitectónicas e arqueolóxicas.”
A axenda de mañá. inclúe as ponencias de Tino Mager, secretario xeral do Comité Científico Internacional ICOMOS Auga e Patrimonio; James Douet, consultor da Conservación do Patrimonio Industrial; Miguel Ángel López García, director da Cunca Sil de Iberdrola; Michel Cotte, profesor emérito da Universidade de Nantes; Carlos Nárdiz, doutor enxeñeiro de Camiños, canais e portos; Alfredo Conti, profesor da Universidade Nacional de La Plata (Arxentina); Josep María Mallarach, da Comisión Mundial de Áreas Protexidas; Heiner Krelling, da Universidade Ca’Foscari, e Jessica Brown, do grupo especializado en paisaxes protexidas. Ademais, Cipriano Marín moderará a mesa redonda Valores patrimoniais das paisaxes da auga e Mario Crecente a de Coñecemento tradicional e os retos do futuro.
Paisaxes da auga / Consellería de Cultura
