SOGAPS (Solidaridade Galega co Pobo Saharaui), ONG que traballa na mellora das condicións de vida tanto dos refuxados sahaurauis coma da población residente no Sáhara Occidental ocupado, retoma o impulso da súa actividade na provincia de Lugo.
Tal e como se expuxo na anterior convocatoria, “Vacacións en Paz” é un proxecto de acollida temporal de nenas e nenos saharauis durante os meses de xullo e agosto, que en Galicia leva a cabo SOGAPS a petición expresa do goberno da República árabe Saharaui Democrática (RASD).
Galicia vén participando nesta iniciativa solidaria desnde o ano 1991, ofrecendo ás familias saharauis a posibilidade de que os seus fillos teñan unha estancia agradable, humana e culturalmente rica, baixo a supervisión e coidados das familias acolledoras galegas.
O obxectivo é trasladar a nenas e nenos saharauis, procedentes dos campamentos de refuxiados saharauis en Tindouf (Arxelia), para pasar dous meses do verán acollidos por familias galegas.
A charla deste venres estará impartida pola presidenta de SOGAPS, Maite Isla, quen ampliará información e resolverá as dúbidas que as familias podan ter en relación con todo o que conleva participar no programa de acollida. Darase conta tamén das diferentes accións que se pretenden levar a cabo cas diferentes administración locais da comarca ás ques se lles solicitará colaboración para axudar ás familias que decidan acoller a través do programa “Vacacións en Paz 2024″.
