Esta cata forma parte dos esforzos da Denominación de Orixe Ribeira Sacra para destacar a calidade e singularidade dos seus viños no panorama internacional. A presenza dun experto da talla de Centelles subliña o prestixio e recoñecemento dos viños desta D.O.
En palabras de Centelles “A Ribeira Sacra é unha rexión que se valora moito tanto polo esforzo da viticultura que conleva como polos seus produtos, concretamente os seus Mencías atlánticos frescos e os seus Godellos puros e limpos, estes son viños moi atractivos para o mercado”.
Durante a cata, Centelles comentou que o consumidor especializado quizais non valora tanto o custo desta vendima heroica, se non máis a alma e a diferenciación dos viños. “Os viños de Ribeira Sacra son viños moi únicos e singulares, con moito frescor, con toques herbais e vibrantes. Ao consumidor final non podemos pedirlle que valore unha vendima máis esforzada pero podemos ofrecerlle viños máis atrevidos, máis delicados e con máis carácter”, destaca.
O catador concluía que “hai que potenciar máis a singularidade, que as adegas non teñan medo de facer viños dun único viñedo, que faltan, e que non teñan medo de facer viños delicados. Delicadeza é o que falta historicamente en España e a Ribeira Sacra ten o potencial de ofrecer eses viños.”
Ferran Centelles xa visitara o Consello Regulador no 2020. Naquela ocasión, a súa visita estivo enfocada en reunirse con hostaleiros e adegueiros da rexión para promover o proxecto Bullipedia, unha enciclopedia de coñecemento gastronómico impulsada polo equipo do restaurante.
