Margaride é unha localidade que pertenece ao concello de Quiroga, situada a carón do río Lor e con vestixios que acreditan o paso dos romanos. Concretamente conserva unhas covas que foron galerías no lugar coñecido como ‘complexo aurífero do Medo’, ubicación onde se realiza a ‘Festa do ouro’, un evento que vén impulsando estes anos a veciñanza a través da Asociación de Veciños e Veciñas de Margaride.
Veciñas e veciños engalanan as rúas con motivos celtas e romanos ademais de ir incorporando na zona do Medo motivos relacionados con aqueles tempos de invasión romana. Trátase dunha romaría castrexo-romana que une á veciñanza lembrando o pasado histórico, e que tamén se concibe para dar a coñecer a pegada dos romanos aos visitantes a través de actividades divulgativas.
No lugar do Medo, ademais de vestixios do que foron galerías auríferas, poden atoparse, a xeito de recreacións elaboradas polos propios veciños: unha catapulta, unha palloza e un ariete.
A Asociación de Veciños/as de Margaride anima a veciños/as e visitantes a vestirse de castrexos/as ou romanos/as e visitar Margaride para vivir o ambiente, coñecer o pasado romano destas terras e participar da festa.
PROGRAMA 2024
Ás 11:30 h haberá unha Misa en latín.
Ás 12:00 h. Visita ás adegas, antigas galerías auríferas, acompañados de gaiteiros.
Para as 14:30 h. está programado o xantar de confraternidade veciñal no ‘Campamento castrexo-romano’ deseñado para a ocasión. Xantar que pode reunir por enriba do cento de persoas.
E xa pola tarde, varias actividades de lecer para pequenos/as e maiores.
Ás 17:30 h. haberá diferentes actividades infantís para castrexos e romanos: chave, busca do ouro e actuación de maxia a cargo de “Deimi o Mago Castrexo”.
Ás 18:30 h. Conferencia na Cova do Medo a cargo de Luís Francisco López González, Doutor en Arqueoloxía e natural de Torbeo.
Para a noitiña, ás 20:00 h. festa con DJ Kola, e ás 22:00 h. Cea no Campamento Castrexo-romano.
Como remate á xornada, ás 23:00 h. ‘Nox Terrorem’: rituais celtas con Rumoris Fabulam Veri (Lenda, fábula ou verdade) e queimada para todos/as. E a partir das 00:00 h. verbena co grupo La Indirigible.
