Este inicio de vendima débese a particularidades moi concretas dos terreos nos que se atopan estes viñedos, onde as condicións climáticas e o estado de maduración da uva son óptimos. Con todo, a maioría das adegas e viticultores da Denominación de Orixe esperarán a que as uvas alcancen o punto de maduración ideal antes de iniciar a vendima.

Este é un inicio de vendima puntual por parte das tres adegas, debido a que polo momento non se levou a cabo a reunión do pleno do Consello Regulador que marca a data recomendada para o inicio oficial da vendima na D.O. Ribeira Sacra.

Esta data estará marcada polo estado de maduración óptimo da uva, segundo indiquen os controis de maduración que están realizando desde o pasado 26 de agosto, técnicos do Consello Regulador, nas 5 subzonas: Amandi, Chantada, Ribeiras do Sil, Ribeiras do Miño e Quiroga-Bibei.

O Consello Regulador continuará supervisando o desenvolvemento da vendima ao longo das próximas semanas, facilitando que leve a cabo nas condicións óptimas. Este ano, ata o momento, non se rexistraron incidencias climáticas nin fitosanitarias significativas que afectasen á colleita.