A experiencia da actividade que promove o Consorcio de Turismo Ribeira Sacra, semellante á de edicións anteriores, pretende que os visitantes deste destino turístico teñan a oportunidade de poñerse na pel dos “viticultores e viticultoras heroicas”. Deste xeito, reprodúcese o que sería un día de vendima tradicional nas pronunciadas ladeiras da Denominación de Orixe Ribeira Sacra.
DESENVOLVEMENTO DA ACTIVIDADE E RESERVAS
Comézase a xornada cunha breve introdución e paseo polo viñedo, acompañados dos propios colleiteiros, quen ensinarán as particularidades do chan e das uvas a colleitar. A experiencia continúa coa organización de traballos e aparellos necesarios para levar á viña, recollida e carretaxe da uva e, posteriormente, os que se animen, poderán pisar os acios como se facía antigamente.
Os participantes tamén terán a oportunidade de realizar unha cata de uvas, mostos e viños, ademais de desfrutar dun pequeno tentempé ao rematar, tal e como se fai nunha xornada habitual de vendima.
É unha actividade dirixida a todas as idades e a súa duración é dunha media xornada estendida; inclúe o transporte en microbús, guía especializado en enoturismo e todas as actividades en viñedo e adega. Todos os que participen do pisado tradicional da uva, poderán recibir nos seus domicilios unha botella de viño cando este estea listo para a súa degustación.
A saída será ás 10:30 h. dende o Parque dos Condes de Monforte, lugar onde tamén rematará a actividade ás 16:40 h. aproximadamente. No que respecta aos prezos, para adultos o custe é de 15 euros. Nenos de 4-12 anos, 10 euros. Menores de 4, non pagan.
As reservas están abertas na páxina web do propio Consorcio de Turismo Ribeira Sacra sendo as datas da actividade os días 21, 22, 28 e 29 de setembro.
Trátase dunha iniciativa financiada con cargo ao Convenio de Colaboración asinado entre a Axencia de Turismo de Galicia e o Consorcio de Turismo Ribeira Sacra.
