Coincidindo coa inauguración do Museo de Arte Sacra de Castro Caldelas, tivo lugar en terras caldelás e facendo honor ó irmanamento entre os dous santuarios, o primeiro acto público da recentemente creada Confraría Virxe dos Remedios de Quiroga. Presentouse un novo manto para a Virxe dos Remedios da Ermida, obra do restaurador malagueño, Francisco Naranjo.
A veciñanza desta parroquia quiroguesa tamén se desprazou a Caldelas para presentar unha nova coroa para a virxe realizada coas doazóns dos fregueses e executada pola Orfebrería Montenegro. Tanto esta coroa como este manto serán as pezas que luza a virxe a diario, posto que as presentadas o día da súa coroación canónica reservaranse para datas máis especiais.
Estas dúas pezas permanecerán expostas no Museo de Arte Sacra de Castro Caldelas ata o día 14 de decembro. Este lugar expositivo encóntrase situado en pleno centro histórico, e alberga unha colección única con reliquias que van da época romana ata pezas contemporáneas. Entre os obxectos expostos destacan vestiduras litúrxicas, libros sacros, reliquias traídas por Andrés de Prada, valido de Felipe II, e restos pétreos do mosteiro de San Xoán de Camba, antigo hospital de peregrinos.
O historiador, e comisario da exposición do Museo de Arte Sacra de Castro Caldelas, D. Manoel Carrete, ten previsto que a vitrina, dende o 14 de decembro, pase a custodiar un solideo do Papa Francisco dedicado á Virxe dos Remedios, que solicitou á Santa Sede e espera recibir en breve.
