A Asociación Albores Saúde Mental colabora este ano na decoración da entrada do edificio do Concello de Monforte de Lemos. Os usuarios/as elaboraron dúas árbores con materiais reciclados, principalmente follas de xornal, cunha dobre finalidade: unha meramente estética e outra simbólica coa intención de proxectar unha mensaxe.
Un dos obxectivos do programa de sensibilización que desenvolven é a promoción nos medios de comunicación dunha información veraz e libre de estereotipos no eido da saúde mental. Así, pois, a mensaxe que traen as árbores é a seguinte: “Albores Saúde Mental agarda que se fale da saúde mental con obxectividade e por iso involucramos aos medios de comunicación no noso desexo de ano novo.”
As árbores están expostas na parte baixa do concello, a ambos lados das escaleiras, dende o día 20 de decembro e chaman a atención tanto en tamaño como en creatividade.
Ademais destas árbores tamén se fixeron adornos para poñer noutros lugares públicos tanto de Monforte coma de Chantada.
