O delegado territorial da Xunta en Lugo, Javier Arias, informou do programa de axudas para a mellora das infraestruturas turísticas en concellos de ata 10.000 habitantes, que vén de publicar no DOG Turismo de Galicia, destacando que “supón unha oportunidade para potenciar o turismo como factor de crecemento económico e de reequilibrio territorial favorecendo aos municipios rurais de menor tamaño”.
Ao abeiro deste plan executouse o miradoiro astronómico de Bóveda situado na Serra de Penas, vén a engrosar a oferta turística de Bóveda cunha proposta innovadora no marco do turismo de natureza. Os traballos consistiron na adecuación da explanada, a instalación dunha plataforma de pedra aserrada, e a colocación de tres cadeiras con reclinación para a observación do firmamento, con capacidade para dúas persoas cada unha.
A convocatoria deste ano está dotada con 2 millóns de euros e as achegas poden solicitarse ata o 28 de marzo; concédense en concorrencia non competitiva por orde cronolóxica de entrada ata esgotar o orzamento. Cada concello pode presentar unha solicitude e o importe máximo da subvención será do 100% do investimento subvencionable co límite de 30.000 euros. Na pasada edición na provincia de Lugo financiáronse 18 proxectos noutros tantos municipios da provincia, sumando achegas por importe de 539.000 euros
Javier Arias invitou aos concellos a optar a estas achegas para avanzar na recuperación e fomento da riqueza histórica, cultural, patrimonial e paisaxística que fundamenta os seus atractivos turísticos.
