Desde o 5 de marzo e ata o día 14, o CIM desenvolverá unha campaña informativa e de concienciación arredor do 8M. Tal e como se fixo dende o Concello en campañas como o 25-N, instalarase un vinilo no Bus Urbano municipal, co obxectivo de sensibilizar á poboación monfortina e facer un chamamento a participar na concentración do 8M. Nesa xornada iluminarase de cor malva a Torre da Homenaxe co obxectivo de impactar na poboación monfortina para que adquira conciencia e sensibilidade co motivo da conmemoración do 8M.

O acto central conmemorativo do “Día Internacional da Muller” terá lugar o sábado 8 de marzo ás 12:30 horas no Espazo do Cuadrado do Parque dos Condes, espazo no que se inaugurará un Mural en homenaxe ás lavandeiras do Río Cabe realizado pola artista Xoana Almar, a cal nestes días está a rematar de pintar dito mural.

“Con este mural quixemos render unha homenaxe ás nosas mulleres lavandeiras de Monforte, que realizaban este traballo tan duro e tan necesario na vida daqueles tempos e, como de costume, era tan pouco valorado”, explicou Margarita López, quen describiu tamén en que consiste o mural.

O formato horizontal do muro do Espazo do Cuadrado determinou a composición de Xoana Almar: unha fileira de mulleres nun primeiro plano lavando no río. O estilo ten relación coa pintura de Xosé Vizoso, artista gráfico de Mondoñedo, recentemente falecido, a través da composición formada por figuras sinxelas e expresivas.

Tras a inauguración do mural adicado ás lavandeiras, procederase á Lectura do Manifesto, que correráa cargo de Margarita López Rodríguez, Concelleira de Muller e Igualdade. E tras el, repartirase entre o público asistente material de sensibilización serigrafiado coa imaxe do Mural, en concreto, libretas e bolsas de tela.

Tanto o Mural como o material de sensibilización están financiados con cargo aos créditos recibidos do Ministerio de Igualdad, Secretaría de Estado de Igualdad y contra la Violencia de Género para o desenvolvemento de novas o ampliadas competencias reservadas ás entidades locais no Pacto de Estado contra a violencia de xénero para o exercicio 2024.

Obradoiros para o alumnado

Como en pasados anos, o Concello segue ideando obradoiros tanto para alumnos e alumnas de Primaria coma de Secundaria, dado o éxito e a efectividade que teñen entre o estudantado.

Para os alumnos e as alumnas de 6º de Educación Primaria, “organizamos un  Escape Room Virtual titulado “Bruxas e Meigas en Serra da Veiga”, que ten por obxectivo promocionar a igualdade efectiva entre mulleres e homes a través dunha aproximación histórica ao fenómeno da caza de bruxas e o movemento feminista” destacou a Concelleira de Muller e Igualdade..

Na actividade, que terá lugar os días 10, 11, 12 e 13 de marzo, participará o alumnado de 6º de Primaria dos Escolapios, do Ferroviario, do Torre de Lemos, do Colexio A Gándara, do Colexio Novo e do CEE Infanta Elena.

Respecto do alumnado de Educación Secundaria, desenvolveremos co alumnado de 2º ESO un Obradoiro titulado “Convivencia dixital en igualdade: como previr a violencia de xénero” no que se lle explicará ao alumnado son as oportunidades que nos brindan e que riscos poden presentarse ao facer uso de internet e outras tecnoloxías. Así mesmo, farán prácticas saudables e reflexivas, así como as medidas para evitar conflitos e adquirir competencias en materia de igualdade.

A actuación será levada a cabo por Pantallas amigas, unha entidade que nace no ano 2004 coa misión da promoción do uso seguro e saudable da internet, así como o fomento da cidadanía responsable na infancia e na adolescencia.

A actividade desenvolverase os días 10, 11 e 12 de marzo nos Escolapios, Ferroviario, Torre de Lemos, e nos institutos de A Pinguela e Daviña Rey.

Actividades para todos os públicos

O martes, 11 de marzo, ás 20:00h no Salón de actos da Casa da Cultura “Lois Pereiro” realizarase unha charla informativa dirixida ás familias, persoal docente e público en xeral a cargo de Pantallas Amigas,  terá como obxectivo ofrecer unha perspectiva educativa e analizar medidas de prevención que nos permitan acompañar aos nosos fillos e fillas dende a educación dixital positiva para facer fronte ás situacións de risco derivadas do uso da Internet, móbiles e outros servizos e tecnoloxías conectadas, así como os hábitos de uso e os beneficios que estes aportan.

O domingo, 9 de marzo, ás 18:00h. no Salón de Actos da Casa da Cultura levarase a cabo un espectáculo de maxia educativa “A igualdade non ten truco” da compañía profesional de ilusionismo Magia en la Manga, que terá unha duración de 60 minutos, con entrada gratuíta e irá dirixida ao público familiar.

Finalmente, o xoves, 13 de marzo, ás 20:15h no Edificio Multiusos terá lugar unha nova cita co teatro para adultos dentro da programación da Rede Galega de Teatros e Auditorios. En colaboración coa Concellería de Cultura desenvolverase a representación teatral “As Alumnas” a cargo da Compañía Culturactiva.

Datos do CIM de Monforte

No ano 2024 realizáronse 1.713 consultas no Centro de Información á Muller de Monforte, nas áreas xurídica, psicolóxica, de atención a vítimas de violencia de xénero, orientación de emprego ou recursos. Foron 219 mulleres atendidas a través destas 1.713 consultas. En 2023, foron 1.536 consultas, sendo atendidas 203 mulleres.

No que vai de ano 2025, ata principios de marzo, realizáronse 316 consultas.