Baixo ameaza de chuvia uns minutos antes da unha do mediodía deste sábado os confrades, ataviados co seu traxe de gala (capa de cor burdeos e sombreiro negro), acompañados do Grupo de gaitas O Recanto, recorreron a travesía principal da vila quiroguesa, dende a Casa Consistorial ata o Museo Etnográfico de Quiroga.
Este solemne acto -que presiden o Confrade Maior, o alcalde quirogués José Luís Rivera Castro, e o presidente da Confraría, J. Manuel Rodríguez-, forma parte dos prolegómenos da Feira do Viño de Quiroga dende o ano 2012, ano no que se fundou esta congregación.
Este ano o desfile contou cun número maior de integrantes, xa que foi o primeiro acto oficial no que participaron os novos membros da institución vitivinícola que tomaron posesión do seu cargo no pasado mes de marzo. Como remate do desfile, xa a porta pechada, os membros do gremio realizarán unha asemblea anual nas instalacións do Museo Etnográfico.
Desfile da Confraría do Viño de Quiroga / Concello de Quiroga
Promoción en Instagram
A Concellaría de Turismo do Concello de Quiroga promociona a XLIII Feira do Viño de Quiroga a través dunha campaña na súa conta de Instagram (@turismoquiroga). Esta iniciativa ten como obxectivo dar visibilidade ás bodegas participantes na feira e atraer a un público máis amplo e variado.
Para conseguir unha imaxe fresca e desenfadada, creouse un collage de cada unha das bodegas participantes na feira, o que permite mostrar a diversidade e a calidade dos viños da zona dunha maneira alegre e informal.
Ademais, como parte desta campaña, estase a levar a cabo un sorteo de botellas de viño de adegas de Quiroga entre as persoas que sigan a conta de Instagram da Concellaría de turismo e teñan en conta unha serie de requisitos para facer efectiva a súa participación.
