O ‘Val de Quiroga de tapas’ celebrou a súa décimo terceira edición neste comezo de abril e este mércores realizábase o reconto de votos aos petiscos que concursaban dos establecementos participantes de Ribas de Sil e Quiroga. Os rexedores de Ribas de Sil, Roberto Castro, e de Quiroga, José Luís Rivera; así como o Concelleiro de Xuventude quirogués, Luis Manuel Arias e a delegada na zona sur da Asociación Provincial de Empresarios de Hostalería e Turismo de Lugo (APEHL), Beatriz Vila foron os encargados de facer o devandito reconto.
Este ano participaron dez establecementos, seis de Quiroga: O Portón (Delicias do Portón), A Botica (Arroutada), Chapacuña 3 (Chipi, chapa, choco), Matrioshka (Raviolis caseros con salsa San Simón), Lago (Lagoyaki de pulpo) e Ruxe-Ruxe (Terra sacra e lume); e catro de Ribas de Sil: A Cabina (Solomío, solo tuyo), Las Vegas (Trampantojo), Restaurante Praia Fluvial (A perla negra) e Mesón Luís (A voltas co churrasco).
O establecemento gañador do reconto de votos darase a coñecer o vindeiro sábado tras o pregón da Feira do Viño, cando se lle faga entrega dunha placa conmemorativa e 100 € en metálico.
Pero ademais os tapacartóns depositados nas urnas polos participantes que completaron a degustación das tapas entraron nun sorteo no que podían gañar diferentes premios, dende 200 € ata comidas ou cestas con produtos típicos da zona.
Tanto os representantes de cada concello como a representante da hostalaría cualificaron o concurso de éxito e destacaron a cantidade de veciños e visitantes que se moveron durante a súa duración polos establecementos participantes.
