Co Plan Activa, destinado sobre todo a maiores de 55 anos, preténdese favorecer o envellecemento activo e mellorar a calidade de vida, fomentando as relacións e os intercambios interxeracionais, así como a aprendizaxe de novos coñecementos.

Das novas actividades propostas foron as de taichi e cerámica as que tiveron unha acollida excelente, de tal xeito que as persoas participantes nestas modalidades, solicitaron a súa continuidade. Todas as actividades do Plan son gratuítas.

Para coñecer a valoración dos usuarios do Programa, dende o Concello realizouse unha enquisa de satisfacción na que participaron 332 persoas, obtendo uns resultados excepcionais:

• Grao valoración de actividade: excelente/axeitado para o 98%.
• Grao de valoración de monitor: excelente/axeitado para o 99%.

Así mesmo, os participantes manifestaron sentirse máis activos, e valoraron en positivo o compañeirismo, o coñecer a persoas, o influxo positivo no seu estado de ánimo…

O Alcalde convidou ás asistentes a apuntarse á seguinte edición do programa e felicitou á Coordinadora de Servizos Sociais e a todo o Grupo de Traballo, por estas valoracións tan positivas.