Os montañeiros de Monforte, Pantón e Sober, con longas traxectorias neste deporte, crearon na Ribeira Sacra 3Cumios para “unir alpinismo, solidariedade e compromiso”. O Huascarán é o lugar do planeta con menor forza gravitatoria na superficie terrestre, e representa o desafío máis ambicioso de cantos acometeron, segundo explican. Como parte da preparación e a modo de proba de aclimatación e adestramento, tamén ascenderán ao Nevado Pisco, de 5.752 metros.
O equipo asume a dificultade do reto, xa que se estima que só entre o 40 % e o 60 % das expedicións logran alcanzar o cumio do Huascarán, pero afirman que están preparados fisicamente e mentalmente e comprométense a “intentalo con todo o noso esforzo”
Colaboran con 3Cumios a Xunta de Galicia e a Vicepresidencia da Deputación de Lugo, entre outros. O delegado territorial de Lugo, Javier Arias, sinalou na presentación deste venres que se trata dun proxecto “ambicioso, inspirador e tamén solidario”, dado que parte da orzamento recadado irá destinado á compra de material deportivo para as escolas das comunidades locais máis desfavorecidas, co fin de facilitar o acceso ao deporte coma unha ferramenta de crecemento e superación.
Na súa intervención no acto, o vicepresidente da Deputación, Efrén Castro, valorou a iniciativa “como un exemplo de que desde lugares pequenos se poden abordar grandes proxectos deportivos” e destacou que “a visibilidade de persoas e proxectos repercuten positivamente no desenvolvemento das diferentes disciplinas deportivas”.
