Serán 8 os apicultores que este ano presenten o mel dende puntos tan distantes no municipio como Montefurado, Outeiro ou Paradapiñol, deixando claro porque este produto comparte en Quiroga un lugar destacado, xunto co viño e o aceite.

Estes apicultores teñen as súas colmeas en diferentes puntos do municipio polo que o mel que producen tamén é moi distinto. As colmeas situadas nas zonas máis altas do municipio producen mel co predominio do castiñeiro, mentres que os situados nas zonas do val dan mel de brezo, planta moi abondosa e da que Quiroga recibe o seu nome (queiruga); nas zonas intermedias as abellas recollen o pole de castiñeiros e queirugas que xuntan con moitas outras flores dando un mel multifloral, grazas a gran variedade na flora deste territorio  onde  conflúen  vexetación  atlántica e mediterránea. Tres variedades con matices diferentes en canto a cor, textura e sabor pero coa mesma calidade.

O recinto feiral para a venda de mel e outros produtos apícolas como xelea real, pole ou própole, abrirase ás 11:00h na rúa Real, nas inmediacións da casa consistorial. Durante a mañá desta xornada non faltará a música adicada ao mel. O grupo de gaitas local O Recanto encargarase de facer unha alborada e ás 13:00h o grupo NoAllKansas, animará a sesión vermú cos éxitos máis emblemáticos das décadas dos 70, 80 e 90 cun toque moderno.