O martes, 12 de agosto, celebrarase a Feira da Rosca. Os postos abrirán ás 10:00 horas para ofrecer os produtos típicos desta celebración, entre eles a rosca e o mel. Ás 11:00 horas haberá unha demostración de talla con motoserra a cargo de Eugenio Linares.
De 11:00 a 13:00 horas desenvolveranse o obradoiro de feltro para todos os públicos de Ovella Viva. Á mesma hora dará comezo un obradoiro de cestaría en vivo a cargo do CENTRAD da Vicepresidencia da Deputación de Lugo.
Ás 12:00 horas actuará o grupo de música tradicional Os Valouros no marco do programa Tradigalu da Vicepresidencia da Deputación de Lugo. E ás 13:00 horas as persoas que o desexen poderán participar na degustación gratuíta de 2.000 racións de rosca con queixo por cortesía do Concello de Sober, e coa colaboración de Queserías Prado.
A Axencia Galega da Calidade Alimentaria (AGACAL) vai ofrecer na tarde do día 11 unha experiencia gastronómica gratuíta con produtos galegos 100% na Praza do Concello. O cociñeiro, José Manuel Mallón, vai preparar 500 tapas de tres variedades diferentes compostas por empanada de pemento do Couto con San Simón da Costa, Tosta de pan galego con tenreira galega e mostaza de grelos e, como sobremesa, crema de tarta de queixo Irmáns de Leite, mel de Galicia e Granola Ai.
túnel do viño de amandi
O VII Túnel do Viño de Amandi abrirá as súas portas o luns, 11 de agosto, ás 19:00 horas. Á mesma hora haberá unha actuación do grupo Nectarine Soul.
No evento, organizado por Vinosacra, participan 25 adegas e 50 referencias de viños da subzona de Amandi e Sober que se poden degustar nunha carpa instalada na Praza do Concello. Colabora ademais a empresa cárnica lucense Torre de Núñez.
O Túnel no que degustar os viños de Amandi estará aberto ata as 23:00 horas. O martes abrirá en horario de 11:00 a 15:00 horas.
