A programación deseñada pola Asoc. Cultural As Cavarcas continuará cun curso de restauración de apeiros de labranza, que se celebrará os días 11, 13, 18,19, 20 e 22 na antiga cámara agraria de Cruz do Incio.

Terá horario de 17:00h a 20:00h e as persoas participantes deberán levar as pezas que queiran restaurar. Esta será a 3ª edición dunha cita que contou con moito éxito de asistencia nos anos anteriores.

Coincidindo coa feira de ano do 22 de agosto, celebrarase unha xornada de xogos tradicionais a cargo de Xotramu (asociación de xogos tradicionais de Muimenta).

As actividades completaranse coa colaboración con Siháho Consulting SLU, especialistas en medio ambiente, para a instalación dun novo composteiro no colexio público do Incio Ricardo Gasset. A iniciativa forma parte do proxecto Bichocompost, para identificar os invertebrados que interveñen no proceso de compostaxe ou están presentes nas redes tróficas de dito proceso e editar unha pequena guía de fauna presente na composteira. Coa coordinación da rede de mestres composteiros de España, Composta en Red, e a universidade de Granada coa colaboración dos mestres composteiros asociados á rede de ámbito nacional.