O acto contou coa presenza da alcaldesa de Triacastela, Olga Iglesias, que deu a benvida e puxo en valor o papel das mulleres do rural como transmisoras de coñecementos e coidadoras da memoria colectiva. Tamén interviron Hadriana Casla, directora do proxecto, e o actor, Xosé Antonio Touriñán, que participa na divulgación da iniciativa cun enfoque creativo e emocional.
Un proxecto para poñer en valor a memoria, os coidados e os saberes das mulleres rurais Mulleres que Contan ten como obxectivo recuperar, visibilizar e activar os coñecementos e prácticas culturais e de coidado que sostiveron durante décadas a vida no rural galego, a través das voces das súas protagonistas: as mulleres maiores.
Ao longo dos próximos meses celebraranse obradoiros participativos nos distintos territorios implicados, cun enfoque centrado no coidado comunitario, o autocoidado e a transmisión de saberes.
Dende o GDR Ribeira Sacra-Courel, con esta proposta destacan a importancia de que as políticas de desenvolvemento rural recoñezan o papel central das mulleres como axentes de cambio, memoria e sostemento social. Esta presentación foi un primeiro paso para achegar o proxecto á veciñanza e convidar ás mulleres da zona a participar activamente.
