O delegado territorial da Xunta, Javier Arias, participou este venres en Láncara na clausura do obradoiro dual de emprego Os Soutos, promovido por este concello xunto cos de Samos e Paradela. A actividade foi financiada pola Consellería de Emprego, Comercio e Emigración con 412.000 euros.
Arias destacou que os obradoiros impulsados pola Xunta “céntranse en sectores nos que existe demanda de profesionais cualificados”, polo que animou ás persoas alumnas-traballadoras que hoxe recolleron os seus diplomas “a aproveitar esta oportunidade para abrise paso no mundo laboral”.
A formación teórica complementouse con tarefas prácticas que serviron para mellorar varios espazos dos tres municipios. Así, en Láncara leváronse a cabo labores de acondicionamento na área fluvial e na zona da estación; mentres que en Paradela traballouse no paseo do Malecón e na ruta do Loio. No que respecta a Samos, actuouse nas contornas da piscina municipal, o campo da festa e a Horta da Botica; ademais de mellorar xardineiras en diferentes puntos do casco urbano.
Obradoiro Dual de emprego compartido por Láncara, Samos e Paradela / Delegación territorial
