A Audiencia Provincial de Lugo acolleu este luns a primeira das dúas xornadas previstas do xuízo contra dúas mulleres da Pobra do Brollón que están acusadas de estafar a unha veciña, maior e con demencia, que xa faleceu, e para as que se piden 4 anos de prisión. Un gran número de testemuñas comparecen nesta vista, na que a Fiscalía tenta demostrar que ambas as mulleres foron autoras dun delito de estafa continuada, no ano 2016, contra esta veciña, feitos polos que foron denunciadas a través dos sobriños da veciña falecida.
No relato de feitos, déixase claro que a muller, hoxe xa falecida, foi a encargada de coidar dos seus irmáns, que lle legaron parte do patrimonio, e posteriormente, coa idade, iniciou un proceso de deterioración cognitiva e mental que a levou a numerosos brotes de agresividade contra os veciños e familiares cos que trataba. Debido a iso, de común acordo os sobriños e a traballadora social, foi ingresada nunha residencia de maiores do Barco de Valdeorras, onde permaneceu escasamente un mes, xa que as dúas acusadas, amigas e veciñas da anciá, acudiron ao centro, de onde a sacaron para levala a vivir cunha delas, nunha casa do termo municipal de Monforte.
Durante este tempo, acúsaselles de, “cun plan preconcibido e movidas polo ánimo de obter un ilícito beneficio”, influír nela para que lles doase tres leiras, dúas na Pobra do Brollón, na localidade de Vilachá, e outra en Monforte, no lugar de Carud. Así mesmo, acudiu nunha ocasión ao banco para retirar 2.000 euros. Despois destes feitos, as dúas mulleres abandonaron á anciá no hospital de Comarcal de Monforte asegurando non poder facerse cargo dela máis tempo, polo que foi despois ingresada na residencia de maiores de Chantada, onde faleceu en 2019 despois de que se lle declarou a súa incapacidade total.
A sobriña que dirixiu a denuncia contra as dúas veciñas da súa tía asegurou que a muller tivo sempre o coidado e supervisión dos diferentes membros da familia e que foi ingresada por primeira vez na residencia porque non se tomaba a medicación, era agresiva e non estaba ben alimentada, entre outras mostras de deterioración. Tamén quixo deixar claro que tanto da cesión das leiras como do diñeiro foron coñecedores unha vez a anciá volveu estar ingresada no xeriátrico. Todos estes puntos foron corroborados tamén pola asistente social, que a atendeu desde 2010 e durante este tempo.
Unha vez iniciado o xuízo, o Ministerio Fiscal pediu varias modificacións sobre o seu escrito, entre elas o aumento da pena para cada unha de 3 a 4 anos de prisión. Tamén presentou unha valoración das leiras que foron cedidas a ambas as mulleres, nun valor de 64.000, 34.654 e 119.800 euros, respectivamente. Mantivo a contía de reclamación da responsabilidade civil, cifrada en 2.000 euros de indemnización para os herdeiros da muller. Pola súa banda, a acusación particular reclama 5 anos de pena e 9.680 euros de indemnización. O xuízo continuará mañá e pecharase coa declaración das dúas acusadas.
