O director da Axencia Galega da Calidade Alimentaria, Martín Alemparte, vén de participar na presentación do Proxecto Rosca de Sober, impulsado pola Consellería do Medio Rural e centrado na investigación e caracterización deste produto. Durante o acto, o director explicou que esta iniciativa ten como fin recuperar e reivindicar este doce, que é “testemuña viva da identidade dun territorio” e “patrimonio gastronómico”.
PROXECTO ROSCA DE SOBER
O proxecto consta de tres eixos principais: a documentación e preservación das calidades da rosca de Sober, o desenvolvemento de sistemas de elaboración e de conservación que respecten a súa autenticidade, e buscar novos usos culinarios para atoparlle espazo á Rosca de Sober na gastronomía contemporánea e na hostalería.
Participarán no desenvolvemento do mesmo persoal do Centro de Investigacións Agrarias de Mabegondo (CIAM), dependente da Consellería de Medio Rural; persoal da Cátedra do Pan da Universidade de Santiago de Compostela (USC), ademais do propio Concello de Sober, rosqueiros e o cociñeiro Martín Mantilla.
Ademais do anterior, tamén se ten previsto reforzar a celebración da Feira da Rosca, festa que en 2026 chegará á súa XXIX edición e que se presenta como escaparate para dar a coñecer a súa singularidade.
Martín Alemparte sinalou que esta colaboración se dá nun contexto de especial importancia para o territorio da Ribeira Sacra, xa que se está a impulsar a súa candidatura como Patrimonio Mundial da Unesco. Neste sentido, a Rosca de Sober, como produto singular e exclusivo da zona, pode contribuir tamén ao recoñecemento internacional e ao desenvolvemento turístico e económico da zona.
