A poboación de Canaval, no Concello de Sober, celebra esta fin de semana as súas festas na honra da Virxe do Rosario.

O comezo tivo lugar xa este pasado venres cunha pancetada popular e as actuacións musicais do Dúo Trasnos e do grupo JB Son que amenizaron a velada ata a madrugada.

Para hoxe, sábado 11 de outubro, espéralles á veciñanza e visitantes un día grande con atractivas propostas musicais. Pola mañá unha alborada que dará paso á misa solemne ás 13:00 h. e despois sesión vermú co grupo M3 Show. E xa pola noite, ás 22:00 h., unha verbena especial na que se rende homenaxe ao gran Juan Pardo. No escenario estarán Antonio Barros, a súa filla Lys Pardo, Fernando Calderón e Ialma. E como traca final a esta noite de música, ofrecerá un concerto Pili Pampín a partires das 23:00 h.

O domingo 12 rematarán os festexos coa misa e procesión a partir das 13:00 h. e unha sesión vermú a cargo da Banda de Música de Sober.