As deputadas populares destacaron que as obras previstas pola Xunta adaptarán os máis de 570 metros cadrados das actuais dependencias da Oficina de Emprego na rúa Doutor Casares para acoller tamén o Polo de Emprendemento.
O Polo de Emprendemento e Apoio ao Emprego de Monforte desde a súa posta en marcha, hai tres anos, leva atendido uns 300 proxectos empresariais. O servizo presta asesoramento para proxectos impulsados por emprendedores da capital monfortina, Carballedo, Chantada, Taboada, Bóveda, Pantón, A Pobra de Brollón, O Saviñao, Sober, Folgoso do Caurel, Quiroga e Ribas de Sil.
Por sectores, predominan as iniciativas emprendedoras relacionadas coa hostalería (22 por cento), seguida do comercio (17 por cento) e do sector servizos (16 por cento). Ademais, o Polo de Emprendemento prestou arredor de 900 titorías a emprendedores da comarca de Lemos, dos que o 47 por cento fixéronse a homes e o 53 por cento a mulleres.
