Terriña Salvaxe é o proxecto desta parella valenciana, que decidiu apostar pola vida no rural galego. Tras sufrir un incendio que lles marcou profundamente, algo dentro deles díxolles que tiñan que volver. E así o fixeron, con máis forza, ilusión e compromiso ca nunca. En Quiroga deron forma a un espazo onde conviven a tradición e a creatividade, ofrecendo sabores con alma e un recuncho cheo de vida compartida.

Laura e Jeyco chegaron por primeira vez á aldea de Outeiro en outubro de 2023. Alí colleron un local que funcionaba como cantina e aloxamento rural e bautizárono como ‘Terriña Salvaxe’. O 26 de setembro de 2024 un incendio destruíu o local e dúas casas colindantes máis. Volveron a Valencia a coller distancia co sucedido e intentarestr recuperarse desta importante perda, pero as súas ganas de volver rexurdiron.

Tendo claras estas intencións buscaron locais en Quiroga ata que deron cun en San Xulián de Abaixo, o antigo restaurante Escaleira. A volta fíxose efectiva en febreiro deste 2025 e dende abril o ‘Terriña Salvaxe’ emprende unha 2ª vida.

No faladoiro deste mércores “coñeceremos esta historia de rexurdimento e comprobaremos por que estes rapaces escolleron Quiroga como ‘Terra de acollida’ para o seu proxecto hostaleiro”, explica o concelleiro de Servizos Sociais, Xosé Manuel Fernández, que modera estos faladoiros. Espazos de socialización, coñecemento e participación cidadá, onde tras unha breve presentación da persoa convidada, os participantes poden intervir con preguntas ou contando as súas propias experiencias.