A iniciativa da cesión da finca de Tor partía do BNG e coa emenda popular aprobábase que a xestión correspondese á Asociación Prodeme, “unha Asociación cunha implantación moi grande en Monforte e cun modelo de traballo en prol da discapacidade e un proxecto que dinamiza a zona sur, que desde 2008 loita por estes terreos”, aseguran desde o PP.
Consideran que esta finca é das mellores fincas agrarias da provincia, con máis de 200 hectáreas, 75 de terreo produtivo e con regadío. Deste modo o PP espera sacarlle rendemento a uns terreos que considera que a Deputación “ten abandonados, hai 15 anos eran pradería e hoxe hai un monte que incumpre a loita contra os incendios, xa que non está nin desbrozado. A Deputación aforraría en desbroces e arados e cumpriría coa normativa contra incendios”.
Con este resultado na votación do pleno deste martes na Deputación, consideran os populares que “se desautoriza ao alcalde de Monforte, José Tomé”, ao cederlle a Prodeme a finca do Pazo de Tor para a súa xestión, votando diferente a como votaron os socialistas no Pleno de Monforte celebrado este luns pola tarde.
