Co final do ano, o alumnado do IES de Quiroga participaba nunha actividade organizada polo Concello de Quiroga e a área de Cultura de Vicepresidencia da Deputación de Lugo. A actividade “Do TRADI ó TRAP… Baila, morena!” era unha charla coloquio da cantareira, Blanca Villares, na que se interpretaba música en vivo, proxectábanse materiais audiovisuais e narrábase unha experiencia sobre a que falaban os rapaces e rapazas participantes.

A actividade estaba basada no traballo realizado por Blanca Villares, mestra de música tradicional, sobre a revisión do noso cancioneiro popular. Coa finalidade de avanzar na igualdade e na loita contra as violencias, surxe a cuestión de si coa música normalizamos as violencias. Entender a historia das desigualdades que sufriron as mulleres que nos precederon a través dos cantos que delas aprendimos é unha lección de vida.

O obxectivo, sensibilizar ao alumnado en materia de igualdade e erradicación da violencia contra as mulleres. No obradoiro tratáronse as violencias sexuais a través das músicas nos tempos de antes e de agora, e o seu papel nas colectividades que as compoñen…e escoitan; e a través delas e da publicidade ou redes socais abordouse o consentimento, o acoso e o abuso sexual.