As Montañas da Comarca de Quiroga locen estes días un fermoso branco invernal grazas ás copiosas nevadas que están a caer en cotas bastante baixas do territorio, chegando incluso a verse a neve no centro urbano de Quiroga. O venres 23 pola noite puidéronse ver folerpas, algo que non ocorría dende hai moitos anos.
O Alto da Moá e o Alto do Boi presentaban este sábado grandes cantidades de neve sendo necesarias as quitaneves para facilitar a circulación polas principais vías de comunicación dos Concellos de Ribas de Sil, Quiroga e Folgoso do Courel. Algúns núcleos das zonas máis altas da Montaña do Lor e do Courel, que manteñen grandes acumulacións de neve, tiveron algúns problemas de acceso e comunicación pola mañá pero ao longo do día maquinaria local, da Deputación e da Xunta traballaron para despexar os accesos máis conflitivos.
Con todo, a estampa invernal que presentan estes tres concellos do Xeoparque Montañas do Courel é espectacular. Unha imaxe que moita xente está a retratar e compartir estes días a través das redes sociais, ben sexa porque está a vivir en primeira persoa as nevaradas nas súas aldeas, ben sexa porque se achegou a ver de preto a neve e nalgúns casos a xogar con ela en familia.
Segundo a AEMET, o episodio de frío e neve prolongarse toda a fin de semana.
