O panel da cata oficial da XLVI Feira do Viño de Amandi estivo composto por oito catadores e catadoras, profesionais que se reuniron o sábado pola mañá no coñecido Hotel Pazo de Sober. Cataron un total de 72 viños participantes nas cinco categorías que levan premio na feira, que son as seguintes: rosado xove, branco xove, tinto xove (3 gañadores), barrica e outras anadas.
A cata estivo organizada pola empresa especializada neste tipo de eventos, Vinosacra, e os viños gañadores daranse a coñecer este domingo, tras o pregón da feira que ofrece o Chef Rafa Centeno ás 13:00 h.
Na xornada de sábado, amenizando o recinto feiral, actuaron pola mañá a Banda de Música de Sober, cun concerto para o público asistente, e o grupo de música tradicional Mallou. Este último a través do programa Tradigalu da Vicepresidencia da Deputación de Lugo.
Xa pola tarde, e cun gran ambiente de público en todos os postos das 22 adegas, a música correu a cargo da Charanga Bandiños Band, a Charanga Louband, a Orquestra Bravú Xangai, e os Gin Toni’s. Esta última banda animou a noite coas súas mellores versións pop-rock dos 80 e os 90.
