Gran ambiente no primeiro día da XXII Feira Medieval de Monforte coas rúas do casco histórico ateigadas de xente caracterizada e visitantes que gozaron das distintas actividades de recreación medieval e da animación musical.
A inauguración oficial, ás 12:00 h., contou coa xa tradicional salva de artillería disparada coa réplica dunha bombarda do século XIV, unha alborada de lume e o saúdo do Alcalde, José Tomé Roca, en formato de lectura de pergamiño medieval abriron esta mañá na Praza de España. No acto acompañaron ao Alcalde a Tenente Alcalde, Gloria Prada, e as Concelleiras e Concelleiros de Sanidade, Pilar Espinosa; de Obras, Medio Rural e Servizos, José Luis Losada; de Cultura, Marina Doutón; de Deportes, José Manuel Mougán; de Muller, Igualdade e Consumo, Regina López, e de Medio Ambiente, Miguel Tomé. Ademais doutras autoridades e representantes das Forzas e Corpos de Seguridade do Estado.
O Alcalde deu a benvida a toda a veciñanza e visitantes a unha nova edición da Feira e animou a todos e todas a desfrutar dunha festa que “celebra a nosa historia e o noso pasado medieval, a raizame do que hoxe somos”. Un evento, dixo, “único e singular que, grazas a vosa implicación, é hoxe un referente no calendario festivo da Semana Santa, e unha das mellores festas de recreación histórica do noroeste peninsular”. Tendo en conta a esta traxectoria como evento histórico lembrou que o concello segue á espera da declaración de “Feira de Interese Turístico de Galicia”.
REFERENCIAS HISTÓRICAS
Tomé Roca, volvendo atrás no tempo, destacou que Monforte, co Castelo de San Vicente e o seu recinto amurallado, foi un “enclave estratéxico da Galicia Medieval”, e lembrou que xa no ano 1104 “os Condes de Galicia concedéronlle a Froila Díaz e a súa dona Estefanía Sánchez, Señores de Lemos, a refundación de Monforte, autorizando a celebración de feiras para sentar poboación”.
Outra das referencias históricas remóntase aos tempos dos VII Condes de Lemos, “que organizaron xogos con batallas de cabaleiros como as Xustas que hoxe e mañá poderemos desfrutar no campo de terra dos Escolapios”, referiu o rexedor monfortino.
PROGRAMA PARA ESE DOMINGO 5 DE ABRIL
Para coñecer o programa con detalle por actividade e horarios deste último día de Feira Medieval pódese acceder a través da páxina web do Concello de Monforte.
