A Asociación Micolóxica Os Lactouros vén de organizar unha xornada de convivencia en Taramundi na que as persoas participantes, segundo explican dende a entidade, “puideron gozar dun completo programa de actividades nun ambiente de compañeirismo e boa enerxía”.

A actividade incluíu unha ruta de sendeirismo pola contorna natural, un xantar compartido e unha visita ao Museo da Cuchillería de Taramundi, un referente cultural da zona onde os participantes coñeceron de primeira man a tradición artesanal vinculada á navalla.

César Vila, membro da directiva, destacou que “este tipo de actividades son fundamentais para fortalecer a convivencia entre as persoas socias e seguir creando comunidade arredor da natureza e da micoloxía”. Así mesmo, engadiu que “foi unha xornada moi completa, na que combinamos actividade ao aire libre, gastronomía e cultura, nun ambiente inmellorable”.

Os Lactouros agradecen a todas as persoas participantes a súa implicación e actitude positiva que fixeron posible unha xornada tan especial, “un día para lembrar que reforza o compromiso da asociación coa dinamización social e o contacto coa natureza”.