A delegación sur da Asociación Provincial de Empresarios de Hostalería e Turismo de Lugo (Apehl) presenta a terceira edición do seu programa primaveral ‘Marida Maio’, unhas xornadas enogastroturísticas que buscan dinamizar e poñer en valor a Ribeira Sacra. Están patrocinadas pola Deputación de Lugo e desenvolveranse no Centro do Viño da Ribeira Sacra de Monforte de Lemos os xoves de maio, 14, 21 e 28.
ENCONTROS CON SECTORES DIVERSOS QUE DINAMIZAN A RIBEIRA SACRA
Como en anos anteriores, estas tres citas consistirán en presentacións dos viños das adegas participantes xunto cos petiscos de diversos establecementos hostaleiros; aos que tamén se unen empresas dedicadas ao mundo do patrimonio, da arte e do turismo para dar a coñecer os seus servizos.
As sesións, con asistencia libre e de balde, durarán ao redor dunha hora e media, desde o 19.30 h ata o 21.00 h, e estarán amenizadas con música en directo. En calquera caso, a organización dispón que os encontros se limiten a 30 persoas, co cal poderán acceder a esta experiencia aquelas que realicen unha inscrición previa no teléfono 982 412 050 ata completar o aforo devandito.
AXENDA DE XORNADAS ‘MARIDA MAIO’ 2026
A primeira cita celebrarase o xoves 14. Nela participarán a tenda Cova do Xacio, o restaurante monfortino Manuel Bistró, a Adega Ohmio, Restaurante Río Cabe–Hotel Cardenal. No apartado de Tradición, Arte e Patrimonio estarán o oleiro de Gundivós Elías González (Centro Oleiro Reitoral de Gundivós) e a Casa–Museo Genia Trigo.
O 21 de maio, estarán o establecemento monfortino Tributo–Capitol, as adegas Cruceiro e Alouviño, e a artesanía de Pilar Rodríguez de “En Lá”. Tamén estarán representados o Museo Lodeiro e o Catamarán Río Sil.
Para rematar, o xoves 28, estará no ‘Marida Maio’ o proxecto de turismo relacionado coas caravanas, Barvantia; a empresa Coureleando, especializada en visitas guiadas; o Hotel-Restaurante Hermida Rural, e as adegas Os Cipreses e Instinto Romano.
Marida Maio está patrocinado pola Deputación de Lugo e conta coa colaboración do Concello de Monforte de Lemos e o Centro do Viño da Ribeira Sacra.
