A delegación sur da Asociación Provincial de Empresarios de Hostalaría e Turismo de Lugo (Apehl) vén de celebrar a segunda xornada enogastroturística da terceira edición do Marida Maio o pasado 21 de maio.

Nesta ocasión, o Centro do Viño da Ribeira Sacra de Monforte de Lemos contou como convidados co establecemento de hostalería monfortino Tributo Capitol, as empresas vitivinícolas Adegas Cruceiro e Alouviño, a artesá e propietaria de “En Lá”, Pilar Rodríguez e, mediante representantes dos equipos de traballo, polo Museo Lodeiro e o Catamarán Río Sil. O evento contou coa presentación da xornalista radiofónica Manola Porto, de Onde Cero Monforte, e a continuación cada proposta convidada deuse a coñecer ao público cunha breve intervención. A cita estivo amenizada cunha actuación en directo do solista monfortino Isi Castañer.

Dende a organización, na delegación sur da entidade lucense, explican que “estes encontros posibilitan a colaboración entre entidades da zona da Ribeira Sacra para dar a coñecer os seus servizos ás persoas asistentes. Principalmente vitivinícola e hostaleiro, pero tamén turístico e artesanal, empresas de diferentes sectores realizan propostas especialmente ideadas para o formato coas que expoñer as bondades dos seus produtos”.

A terceira edición do Marida Maio será clausurada o vindeiro xoves 28 de maio. Na cita, que comezará ás 19:30 h, participarán o proxecto de turismo de caravanas Barvantia, a empresa de visitas guiadas Coureleando, o hotel-restaurante Hermida Rural e as adegas Os Cipreses e Instinto Romano.

Esta iniciativa está patrocinada pola Deputación de Lugo e conta coa colaboración do Concello de Monforte de Lemos e o Centro do Viño da Ribeira Sacra.